Anjeza Shahini: Edhe të huajt bënin tifo për ne. Në sallë kishte shumë flamuj shqiptarë.

Mëngjesi i dites se neserve te nates finale te Eurovizion, e ka gjetur këngëtaren Anjeza Shahini nën vërshimin e telefonatave nga Shqipëria. Mjaft media shqiptare janë interesuar për emocionet dhe suksesin që ka përcjellë këngëtarja, e cila përfaqësoi Shqipërinë në Eurovizion. E sapozgjuar pas një nate të suksesshme dhe të lodhshme, Shahini është dëgjuar teksa rrëfente mbresat e një nate më parë. Fituesja e vendit të shtatë, Anjeza Shahini, për herë të parë, hapi rrugën për në Eurovizion, duke i dhënë mundësinë Shqipërisë për të qenë finaliste në edicionin e ardhshëm. Sot ajo do të kthehet në Shqipëri ku e presin, mjaft njerëz, shkolla e lënë përgjysmë, dhe miqtë e saj që kanë përjetuar ethe në ditët e Eurofestit.

Si ishte për ju nata finale e konkurrimit?
Ndryshe nga nata e parë, kur u ngjita në skenën e madhe të Europianit, emocionet kanë qenë më të mëdha. Por këto munda t’i ndaja së bashku me pjesëtarët e tjerë të etheve dhe të të gjithë grupit organizativ e, pak a shumë, ato emocione u zbutën duke ia dhënë njëri-tjetrit. Ky festival na ka dhuruar mjaft emocione, ndërkohë që edhe publiku na ka dhënë shumë zemër gjatë të gjithë kohës së konkurrimit tonë. Ishin shumë, dhe duartrokitjet e tyre me emociononin, pa lënë mënjanë edhe momentet kur i shihja tek ngrinin flamujt shqiptarë. Por dua të them këtu se jo vetëm ata, por edhe të huajt bënin tifo për ne, dhe kjo na bëri që vërtet të ndiheshim të lumtur.

Sa e vështirë ishte të përfaqësoje Shqipërinë?
Për mua ishte një përgjegjësi shumë e madhe. Shpeshherë e pyesja veten nëse kisha bërë mirë që kisha marrë një përgjegjësi kaq të madhe në dorë. Mund ta quaj pa frikë përgjegjësinë më të madhe që kam marrë në jetën time, sepse nuk është pak kur të gjithë i kanë sytë tek ti dhe thonë kujdes se ke Shqipërinë në krah… Dhe deri në momentin kur ne kemi ardhur këtu në Stamboll kemi pasur paksa frikë, por u ndjemë mjaft mirë në kohën kur të gjithë na pritën mirë dhe e pëlqyen këngën dhe kulturën shqiptare, aq më tepër hyrja në finale apo në dhejtëshe dhe në vendin e shtatë. Përgjegjësia që kishin në ato momente filloi të zbutej dhe ne arritëm ta kalonim mirë, gjë të cilën e tregojnë edhe rezultatet. Jam ndjerë me të vërtetë shumë mirë, saqë më vjen keq që gjithçka mbaroi.

Çfarë ka ndryshuar tek ju pas natës së djeshme?
Ka ndodhur një ndryshim i shpejtë për mua, të cilin nuk e kisha imagjinuar në anën artistike. Por për sa i përket personalitetit dua të them se asgjë nuk ka ndryshuar. Kanë ndryshuar rrjedha e ditës, ndryshime anësore, të cilat mendoj se janë normale për çdo njeri.

Keni pasur oferta nga kompozitorë a muzikantë të huaj?
Gjatë kohës së konkurrimit tonë ka pasur një fluks të madh njerëzish, të cilët na uronin dhe ndërkohë, pse jo edhe na ofronin. Por ne ende ishim në atë valën e emocioneve dhe tensionit të madh të festivalit, ndaj nuk dimë se si u jemi përgjigjur. Por mund të them se kemi mbajtur kontakte të vazhdueshme me të gjithë pjesëtarët e Festivalit Evroian, ata që kanë qenë prezent aty, ku kemi ndërruar numrat e telefonit apo e-mailat, gjë që mund të mundësojë gjëra për më vonë.

Si mendon për fituesit e vendeve të para të Evropianit?
Për fituesit e vendeve të para jam ndjerë mjaft mirë që ishin ata, të cilët i merituan këto vende. Ndërsa, për sa i përket djalit nga Bosnjë-Hercegovina, që edhe ai u fut në dhjetëshe, unë e kam marrë vesh nga të tjerët, që ishte me origjinë shqiptare. Më erdhi mirë dhe kam pasur kontakte me ta, pavarësisht se ishim në hotele të ndryshme. Dje gjatë ndarjes së pikëve ata kishin mjaft dëshirë që ne të kishin pikë sa më shumë, ashtu sikurse edhe ne për ta.

Ç’do të bëni pasi të ktheheni në Shqipëri?
Tani për tani më duhet të kthehem patjetër në Shqipëri dhe të mund të arrij të ndjek edhe në atë pak kohë, që më ka mbetur, shkollën. Unë jam ende në vitin e tretë të shkollës së mesme dhe më duhet ta mbaroj një herë shkollën me sukses. Për më pas, ende nuk e kam vendosur çfarë duhet të bëj. Por patjetër që e ardhmja ime do të jetë muzika, këtë gjë e kam menduar që para shumë kohësh.

10 finalistët
Ukraina
Serbia dhe Mali i Zi
Greqia
Turqia
Qiproja
Suedia
Shqipëria
Gjermania
Bosnjë - Hercegovina
Spanja

Opinione

Alfred Kaçinari
Pjesëmarrja dhe pozicionimi i Shqipërisë në Festivalin Evropian ishte për ne një eveniment, një ëndërr pothuajse e pamundur, që në një kuptim zhvendos edhe paradoksin e të gjitha gjërave të ndaluara. Dhe kjo ndodh sepse këto vitet e fundit kënga shqiptare ka bërë hapa të rëndësishëm drejt simotrave të saj në vendet më të zhvilluara të Evropës. Një aspekt tjetër i rëndësishëm është Festivali në RTSH, që vërtetohet si një festival me nivel shumë të lartë. Është piëkrihst kënga fituese e atij festivali që përballoi me shumë sukses konkurrimin në rang evropian, ndërsa Anjeza përballoi një situatë pothuajse të paparashikuar, e cila mbërriti pak befas.

Zhani Ciko
Për sa i përket vendit të Shqipërisë, është një vend që na nderon. Është një vend që si të thuash edhe pak i papritur, në bazë të rezultatit, pasi shija dominuese e të gjithë këtyre popujve që marrin pjesë (pasi duhet të jetë e qartë që votat telefonike janë nga populli dhe nuk ekziston asnjë lloj jurie) na parapëlqeu. Shqipëria zuri një vend nderi dhe vend surprizues për shumë vende të tjera. Mjafton të kujtojmë që lamë pas këngë që kanë perfeksionin e realizimit, mjafton të kujtojmë Gjermaninë e madhe me produksione botërore në maksimumin e kondicioneve teknike, të sofistikuara. Pra, në këtë vështrim, vërtet jam krenar që munda t’i përjetoj direkt këto momente dhe të jap një opinion për to.

Paskuintat e konkurrimit të Anjeza Shahinit

"Surprizat që mora pas fitores në Stamboll"

Dje kishte dalë nëpër butikët e Stambollit. Një psonisje nëpër rrugët e qytetit të përgatitur prej kohësh për Eurovizionin. Ethet e para ishin arratisur, e para saj shtrihej një ditë e paqtë, një ditë pushimi.

Anjeza Shahini e kishte hedhur pas krahëve sfidën e parë. Tashmë ajo përgatitet për natën finale të Festivalit Evropian, të cilën siç thotë vetë me të qeshur "mezi pret ta heqë qafe". Nëpërmjet telefonit, Anjeza është shprehur mjaft e lumtur, pak e lodhur, por edhe krenare si përfaqësuese e Shqipërisë. "Ka qenë një konkurrim i bukur dhe emocionant", u shpreh ajo, duke rrëfyer detaje të panumërta që nga përfundimi i konkurrimit mbrëmë dhe deri tek kalimi në finale. Dhe këtë herë ka qenë e sigurtë, e fortë dhe plot besim në vetvete. Nuk ka qarë, siç i ka ndodhur ndonjëherë tjetër. Ndërsa telefonatat e pafundme e kanë entuziazmuar shumë, duke i sjellë ndër mend gjithmonë çastin kur në skenën e madhe të Eurovizionit është thirrur emri Albania.

Si u ndjetë në momentin kur u thirr emri i Shqipërisë?
Nuk e di. Kam qenë e turbullt. Por mendoj se pamjen më të saktë dhe emocionet më të qarta janë përcjellë përmes transmetimit në Televizionin Shqiptar. Por dua të them se u mërzita shumë, bëra gabim që fitova (qesh). E çfarë mund të ndjesh tjetër përveçse emocione…?!

Cili ishte personi i parë që ju telefonoi për t'ju uruar pas fitores?
Celulari im nuk funksionon këtu, dhe, në të vërtetë, nuk kam marrë asnjë telefonatë vetë, personalisht. I kanë marrë të tjerët, që kisha përreth, të cilëve shpesh herë u është dashur të më kalojnë urime pafund. Por kam idenë, se të parat që kanë marrë në telefon kanë qenë motra ime nga Italia dhe motra tjetër në Shqipëri.

E keni ndjerë veten me fat mbrëmë (të mërkurën)?
Unë e kam ndjerë veten me fat jo vetëm mbrëmë, por që në momentin e parë, në fillim kur kam nisur të ndjek këtë rrugë. Ndërsa dje kam ndjerë krejt rezultatin e atij fati që deri tani më ka ndjekur e për të cilin jam vërtet shumë e lumtur.

Si ju është dukur skena e Eurovizionit, e madhe, e frikshme?
Ishte vërtët skenë shumë e madhe, por nuk mund të them e frikshme. Madje, ishte shumë e ngrohtë, publiku ishte vërtet entuziazmues. Nuk mund të them e frikshme. E frikshme është kur njerëzit vijnë dhe nuk të duartrokasin. Duartrokitjet ishin aq të ngrohta, sa unë nuk arrija ta kuptoja nga vinin.

Kishte shumë shqiptarë në sallë?
Jashtëzakonisht shumë.

Si ndiheshit kur i shihnit ata me flamuj në dorë?
Emocioni ishte shumë i madh, pikërisht kur shihja ata. Dhe mundohesha të mos i shihja. Unë nuk duhet t'i shihja, ishte më mirë kështu (qesh). Unë duhet të këndoja aty. Ishte tundues fakti që ata "të ftonin", por u mundova që t'i shmangia.

Çfarë mendon se u pëlqye më tepër nga kënga juaj, teksti, ritmi, muzika… Është pëlqyer gjithçka, muzika e gërshetuar me tekstin, ne si zëra, të pestë. Domethënë çdo gjë prej saj. Madje, shpeshherë e kemi kënduar këngën edhe në shqip. Këtu na e ka kërkuar media. Ata donin që ta dëgjonin këngën edhe në gjuhën shqipe, version të cilin e kanë pëlqyer jashtëzakonisht shumë.

Çfarë bëtë mbrëmë, pas konkurrimit, dolët, festuat?
Po, menjëherë pasi kemi mbaruar, shkuam në hotel ku na priste një grup i madh shqiptarësh. Kemi festuar, kemi bërë fotografi, kemi bërë edhe një mbledhje. Pastaj qëndruam deri vonë, në orën tre të mëngjesit. Kemi ndarë emocionet të gjithë së bashku.

Si kanë qenë lidhjet me konkurrentët e tjerë, një pjesë prej të cilëve vijojnë të jenë konkurrentë për ju?
Kam pasur lidhje korrekte do të thosha. Kemi biseduar dhe jemi njohur kryesisht gjatë kohës kur kishim pushim. Sepse të gjitha oraret janë të fiksuara dhe çdo gjë është e më se e saktë. Nuk është se konkurrentët rrinë gjatë gjithë kohës bashkë, por ka pasur plot çaste kur kemi biseduar dhe jemi njohur. Mendoj se marrëdhëniet më të mira i kemi me Maqedoninë, Bosnjë- Hercegovinën, Qipron etj.

Përmende Bosnjën. Përfaqësuesi i saj, Deen, ka një pjesë të familjes së tij në Shqipëri. Keni folur rreth këtij fakti me të?
Jo, nuk kemi bërë ndonjë bisedë rreth këtij fakti. Kjo edhe sepse unë shumë vonë e kam mësuar këtë gjë. Por kur ata kanë bërë festat e tyre na kanë ftuar edhe ne. Kemi festuar e jemi argëtuar të gjithë bashkë.

Kanë mbetur dhe dy ditë… Si e prisni finalen?
Mezi e pres ta heq qafe (qesh). Emocione, kam shumë emocione. Kemi pesë muaj plot me këto emocione dhe gjithë këtë preokupim. E kur e mendoj këtë peshë, mezi pres të mbarojë e gjitha.

Me ç'numër do të renditeni në konkurimin e natës finale?
Si numër? Nuk e kemi marrë vesh akoma, sepse nesër janë provat gjenerale. Pasi sot e kemi pasur pushim pas gjithë asaj lodhjeje të mbrëmjes së djeshme.

Do të paraqiteni me të njëtin luk, si një natë më parë?
Jo, besoj se jo.

Përfaqësoni Shqipërinë në këtë festival, ç'do të thotë ky fakt për ju? Është përgjegjësia më e madhe që mund të kem marrë në jetën time, sepse të kenë të gjithë sytë tek ty, duke të thënë, dëgjo se…, kujdes se… ke Shqipërinë në krah… Me të vërtetë është përgjegjësi shumë e madhe. Megjithatë, unë mendoj se ajo pesha më e madhe që kisha kaloi me sukses.

Përveç miqve, a kishe të afërm nga familja me vete?
Po, kisha mamin dhe babin.

Si u ndjenë ata pas fitores?
Unë isha ajo që nuk gjeja prehje. Sepse të gjithë që shihja përpara i shihja duke qarë. Vetëm unë nuk po qaja në ato momente. E mbajta veten më në fund.

Ju deri tani keni pasur një fat prej Hirusheje. A jeni ndjerë ndopak Hirushe edhe mbrëmë?
Jo, nuk më pëlqen kjo fjalë, nuk më pëlqen.

Si e mendoni natën finale?
Shpresoj të jetë një sukses, një arritje dhe të dal me një performancë të mirë.

Nga mendoni se do të merrni votat më të shumta?
Po, me sa di unë, numri shqiptar nuk mund të votojë për ne. Kështu që shpresoj të marr duartrokitje prej shqiptarëve. Votat pastaj, janë të lira.

Anjeza dhe katër yjet e "Etheve…"

Ishte menduar që në Eurovizion do ta shoqëronte një grup balerinësh të pregatitur nga koreografi Arjan Sukniqi, por rregullat e festivalit e kanë përmbysur këtë ide dhe Anjeza Shahini është shoqëruar në këtë festival nga katër miqtë e saj të "Etheve…" Arbër Arapaj, Tergita Gusto, Klajdi Musabelliu dhe Rosela Gjylbegu. "Ne jemi mësuar t'i ndjamë të gjitha gjërat bashkë dhe nuk mund të mos i ndanim edhe kësaj radhe po së bashku", tha dje Anjeza për miqtë e saj, duke shtuar se "ne dimë dhe kemi ditur gjithmonë t'i ndajmë këto emocione bashkë".

Stavri, një grek që voton për Anjezën

"Unë jam grek, por mendoj se kënga që përfaqëson Greqinë nuk meriton një entuziazëm të madh. Më pëlqen shumë kënga e Anjezës dhe do të votoj për të. I urojmë shumë fat!", kështu shkruante në mesazhet mbështetëse në faqen e Eurovizionit një shtetas grek, i cili e vlerësonte mjaft këngën me të cilën përfaqësohej Shqipëria. Vetë Anjeza nuk ishte e njohur me këtë fakt, por kur e dëgjon shprehet e lumtur, duke theksuar se shumë specialistë, artistë, dhe konkurrentët e tjerë e kanë pritur shumë mirë këngën.

"Edhe media e ka vlerësuar mjaft dhe na ka pritur shumë mirë. Sigurisht, jemi ndier shumë mirë nga e gjithë kjo, sepse është hera e parë që marrim pjesë në Eurovizion dhe mirëpritemi kësisoj", thotë këngëtarja.

Ajo në ajër, Kryeministri Fatos Nano në telefon

Momentin kur kryeministri i Shqipërisë, Fatos Nano, e ka marrë në telefon, e ka përjetuar në mënyrë mjaft të veçantë. "Ka qenë një moment shumë i këndshëm. Sepse në ato çaste miqtë e mi, shokët e mi të "Etheve", në mes të skenës po më ngrinin peshë. Dhe po në ato momente unë me telefon në dorë, isha duke folur me kryeministrin. Ishte një moment edhe emocional, edhe i bukur, por edhe mjaft spektakolar", thotë Anjeza duke theksuar se shumë media e kanë fiksuar dhe e kanë botuar nëpër revista. Dje në mëngjes në shumë prej tyre shfaqej Anjeza ndërsa fliste në telefon me kryeministrin Fatos Nano.

Këngëtarja thotë se biseda shpesh herë nuk dëgjohej mirë, sepse kishte shumë zhurmë dhe entuziazëm përreth. Por, sipas saj, Nano është shprehur se e ka ndjekur me emocione të jashtëzakonshme garën e mbrëmshme, së bashku me bashkëshorten e tij. "U ndjeva vërtet shumë e lumtur në momentin kur kam marrë telefonatën e tyre", thotë Anjeza.